หิ้นยุงกิ๋นเกลือจนปอเป๋นด้อย จะเล้อดาปอยบวชพระ จะก่าหัวเขว ฮากเลียดยาซะจนลุกบ่ ่ได้นอนคราง ปวกกั้นกะทิ เอาใส่ยาขาง อี่ฮวกเป๋นซาง ฮ่างผอมแก้งแด้ง อี่โหวดเกล้าผม ลิงลมทาแป้ง หอยเก็ดแดง แอ่นฟ้อน คางคกนั่งเหงา โศกเศร้าเดือดฮ้อน บ่หมีคู่อ้อนนอนแยง ก่ำเบ้อ ก่ำปุ้ง ให้กิ๋นบ่าแต๋ง แมงสาปแมงแกง จ่างแป๋งก่องเข้า แมงเม่ากั๋วฝน แมงงนกิ๋นเหล้า จ๋นปอเมา ฮากโต้น แฮ้งต๊กเก๊าตาล ขาห้านแข้งโก้น ไปไหนบ่ไดสามเดียน กว่างแม่เขาโซ้ง หุงต้มเข้าเปี๋ยน อิ่นดูขี้เดียน ผะเลิดต๊กห้วย นกเอี้ยงขี้หมา จะต๋าแส้งซ้วย ถูกหวยรางวัล เลขท้าย ซ้ำอ้นกั๊บเห็น ลักเล้นจั่วพ้าย ที่ปอย จะกิ้ม ต๋ายจอย ป๋าค้าว ป๋าเต๊าะ กบเขียดปู๋หอย ไปจ่วยดาปอย ตี๋ก้องโหม้งๆ วอกก่าง เสียหมี นกจี๋แจ๊บโก้ง ฟ้อนกั๋นลำวงเยิบๆ ป๋าป๊กป๋าขาว ตั๋วยาวเติ๊บเปิ๊บ ตั้งใจ๋อยู่หั้น ฟังซอ จะเข้เลี๊ยะฟะ ป๋าหลิดป๋าขอ ลูกหมาหางงอ เป๋นว้อกะด้าง จิหีตจิแต๋น เต่าแลนคิดสร้าง จะแป๋งโรงงานแข่งมด แมงม้าหางงอน เปิ่นได้เลื่อนยศ ติดใส่บั้ง สิบโท นกจอกนกเก๊า เป๋นเจ้าโมโห สับหัวต๊กโต เอาปู๋นก๋านหน้า มดง่ามเสี้ยงใจ๋ ความต๋ายเบื่อหญ้า เขียดอี่จาแก้นน้ำ แมงพิ้งหลบภัย ไปไกล๋เจ่นหล้ำอยู่แผวที่ถ้ำผาไท หอยโข่งจ้ำบ๊ะ บ่ฮู้อายไผ งูน้ำ งูไซ ดังไฟห่อหนึ้ง เผิ้งหมี้นต่อแต๋น หน้าแดงปึ้งหลึ้ง ส่งเสียงเอ๊ดอึง โห่ฮ้อง แมงบ้งออกใส แมงใบ้หลุต้อง หมูแม่ด้องต๋ายมาน อึ่งนิมนต์แย้ ไปส่งสะก๋าน เป็ดไก่กวางฟาน บวชจู๋งตวยก้น เต่าน้ำป๋าผา ไห้หาโจ้น ๆ ตืบๆโยนๆ จ่มตุ๊กข์ ฮอกสิกจุ่งจา หมาเหล้นหมากรุก จ๋นลืมคาบเข้า แลงงาย
วอกเถ้าปี่ทิดสลิดเปี่ยนต๋าย มีนะโยบาย จะขายพริกแด้
ขี้กุ่งแมงจอนหอนดังแผดแผ้ นกเป้านกแล ก๊าโล้ ป๋าหลาดป๋าเข๋มเป๋นตุ่มขี้โม้ ถูกมัดใส่โซ้นอนควาย หมาโก้้งเซ่งหลี้ กำไฮแสนป๋าย เปิ่นยั๊บงัวลาย เป๋นแนวที่ห้า หนูปุ๊กกิ๋นไถ ขะทู้กิ๋นกล้า ปี่หนานแมงดา ฟ้อนเงี้ยว
กุ้งขายก้วยเตี๋ยว ป๋าทูขายเกี๊ยว ถ้วยสองบาทถ้วน รากา เสือเหล้นพ้ายป๊อก มอดฮับค่าต๋า ฟ้องศาลอาญา ถูกปรับซาวเก้า
แม่คอกป๋าต๋อง ต๋ายละลูกเต้า แมงป่องแมงเวา รับเลี้ยง ยาแฝดนางนี จ๊าดดีเม็ดเพื้อง ขายม่วนเสี้ยงหมดเลย ฮุ้งเอาอี่แฮ้ง มาเป๋นลูกเขย แมวโพงกะเทย ถูกมัดเจือกก้น ขอจบค่าวจ๊อย ลั๊วะจ้อยสัปสน ลำบากลำบน บ่เนาจะเสี้ยง จะอู้ไปยาว สาวหื้อหมดเสี้ยง บ่เนา บ่เนืองมากนั๊ก
ขอยุติก่อน สุนทรยั้งพัก จบเท่าอี้ป๋ง วาง…….. /
